再講人壽保險股

一間壽險公司的內含價值, 其實就係間壽險公司現有業務的價值, 但呢個係要建基於你對管理層的信任, 因為內含價值的計算並非完全科學, 也有藝術的成份, 內含價值的計算並非完全客觀, 也有主觀的成份. 內含價值的計算涉及一些假設性的因素, 包括以下幾種:

1.風險貼現率, 例如2628中國人壽07年採用的風險貼現率為11.5%
2. 投資回報率
3. 費用率
4. 死亡率
5. 退保率
6. 發病率
7. 賠付率
8. 有效稅率

如果壽險公司的股價高過內含價值, 高出的部分(溢價) 其實係買緊壽險公司未來新業務的有效價值, 所以對壽險公司的估值, 我好重視一年新業務價值以及一年新業務價值的增長率. 一般來講, 一間壽險公司值幾多倍一年新業務價值, 同佢一年新業務價值的增長率有直接和密切的關係, 同高盈利增長率的公司值高d市盈率, 或者高ROE的銀行值高d P/B 道理一樣.

另外, 想講壽險公司有些特點. 例如, 賣出保單的頭一年, 越賣得多保單, 保險公司虧損越多, 造成一個奇怪的現象, 新業務增長越多越快, 虧損反而越嚴重. 原因係賣出保單第一年的費用通常超過保費收入. 因為保單一賣出, 開支馬上要付出: 例如佣金支出, 手續費支出, 行政費等等, 通常第一年佣金支出佔保費收入好大比例, 其他費用包括驗身費, 核查新客戶資料, 拿健康報告和分析等等需要成本支出. 但第2年, 同樣收咁多保費, 好多支出已經可以免除或者減少. 另一方面, 保單帶給壽險公司的利潤需要好多年甚至幾十年才能完全實現. 換句話說, 壽險係一種長期能夠帶來豐厚利潤, 而相對來講, 初期支出多, 收益少, 後期支出少, 收益多的業務.