收市競價, 指數基金投資者任魚肉

MSCI香港指數, MSCI中國指數成份股組合調整於下星期一生效, 昨日係生效之前最後交易日. 被動的追蹤MSCI指數基金必須跟隨成份股轉換而調整組合, 本來, 基金經理無必要等到以及集中在生效之前最後交易日完成組合調整, 可以在生效之前的其他交易日提前買賣, 甚至在生效之後才完成組合調整. 例如, 如果基金經理有信心成份股股價在生效之後會下跌, 咁佢可以遲d先買貨, 相反, 如果在生效之前的一些日子, 基金經理認為股價抵買, 有信心於生效日的股價會高過當時的水平, 咁佢可以提前買貨. 不過, 對於追蹤指數基金的基金經理來講, 最重要唔係跑贏MSCI指數, 而係唔好跑輸指數, 最穩陣係貼近指數表現. 所以, 有些基金經理落的買賣盤指示, 係要交易經紀以收市價完成買賣. 於是出現寧願不計價買賣, 以免有追蹤誤差的情況, 至於生效日股價會否打回原形而令指數基金的投資者利益受損, 並唔係基金經理的優先考慮.

既然某些指數基金經理可能有如此的想法做法, 有心人可以利用收市競價機制魚肉指數基金(投資者). 由於收市競價時段首8分鐘, 買賣雙方可以隨意落盤, 更改和取消指令, 但唔會即時對盤成交, 有心人可以在競價時段落盤提高股價, 指數基金被迫追價, 然後在接近競價時段8分鐘時更改或取消買盤. 又或者用蝕少賺多的做法, 以高價挂出少量買盤, 同時以高價挂出大量賣盤, 指數基金因為怕買盤做唔到, 局住陪挂出高價買盤, 最終, 少量買盤買高價, 但大量賣盤賣高價, 仍然有著數.