人壽保險股的估值方法

見到網友無名士有以下的留言:

"請注意, 新加坡的投資公司, 即淡馬錫, 功能是為公幣搵投資出路, 為公幣進行資產增值.
至於金管局, 角色類似中央銀行, 負責監管金融機構及貨幣發行, 在新加坡, 具相同角色的機構為新加坡金融管理局.
即使98年香港政府入市買股票, 以及去年買港交所股份, 都是以政府的名義, 同金管局無關.
所以兩者不可以相提並論. 這是金融常識"

首先, 我多謝該網友的指教. 照我所知, 新加坡政府設立新加坡金融管理局、新加坡貨幣發行局和新加坡政府投資公司來執行金融監管、貨幣發行和管理外匯儲備的職能. 而從香港金管局的網頁睇到金管局有以下主要的職能:

1. 維持港元匯價穩定
2. 透過穩健投資策略，管理外匯基金（即香港的官方儲備）
3. 促進香港銀行體系穩健
4. 發展香港金融市場基礎設施，使貨幣暢順流通

換句話說, 香港金管局係做埋管理和投資外匯基金的工作, 其實, 一直以來, 都有學者提出, 香港應該成立類似新加坡政府投資公司的機構代替金管局去管理外匯基金.

以上只係筆者有限的金融知識, 有錯歡迎指正.


另外, 回應網友Kelvin K 有關評估中資金融股的合理價格. 首先講人壽保險股, 我會用以下的方程式去計人壽保險股的估值:

最新每股內含價值 + 一年新業務價值(每股) x 一個倍數 = 每股合理股價

呢個倍數係幾多先合理, 我認為可以用類似PEG的概念, 設立一個叫做NBMG (New business multiplier to Growth ratio). 即係話, 一間人壽保險公司的一年新業務價值增長越勁, 值得更高的倍數.

至於2628國壽值幾多倍, 因為手上只有2004至2006年 3年的數據, 似乎唔足夠去定呢個倍數.

從歷史的數據去睇, 以945為例, 從我手上的資料, 呢個倍數大約係14至17倍. 而2628大約係四十幾至五十幾倍. 註: 係指歷史數據, 唔係指945或2628值唔值呢個倍數.

最後回應無名士: 同意3968現價並非好平, 所以分段買入或者月供係可行的做法.