匯豐ELI最新情況

匯豐ELI最新情況
筆者寫BLOG的目的係分享投資的經歷與過程, 所以, 無論成功與失敗, 無論賺錢與虧損, 無論決策英明或者愚蠢, 無論決定正確還是犯錯, 都唔介意同大家分享.

筆者於12月5日買左匯豐ELI, 當日匯豐的收市價係131.3, 因為2個月之後, 即係2月5日,匯豐的收市價低過131.3的98%, 即係低過128.674, 所以筆者收到2.55%利息, 即係5100蚊之後, 合約自動續多2個月, 期間, 如果匯豐股價低過122.7655, 那一日就無息收. 即係話, 由2月5日到今日為止, 都無息收. 匯豐今日收市價110.3, 比當日131.3下跌16%, 當日筆者估計匯豐會牛皮, 並無預期匯豐股價會趺咁多.

現時筆者覺得有d失落, 唔係因為匯豐股價大跌, 匯豐已經佔筆者的投資組合很大比例, 所以即使我當日無買匯豐ELI, 我都唔會買用那廿萬買匯豐的股票(當然, 筆者會繼續靠以股代息增持匯豐), 我失落係因為我無錢再增持中資金融股, 如果我當日無買匯豐ELI, 現時我會有多廿萬增持中資金融股. 2318平保於12月5日收市價係89.2, 今日收54.05, 下跌左39.4%, 2628中國人壽於12月5日收市價係44.2, 今日收28.4, 下跌左35.7%.

另外, 我雖然於股市較高位減持部分股票套現左30%現金, 算係做得正確, 以致我可以趁最近中資金融股股價大幅調整而有現金增持. 不過, 我同樣在高位買左2319和1886, 雖然只係用左小部分套現左的現金, 不過, 如果我專注於中資金融股, 效果會更好, 總結經驗, 我浪費左高位套現的其中55萬現金, 即係話, 如果我無買匯豐ELI, 無買2319和1886, 我現時有多55萬的子彈可以用來增持2318, 2628, 3328, 和3968. 我唔係話蒙牛唔好, 但同中資金融股比, 我對中資金融股更加喜歡.

今次的教訓, 以後要專注和集中資金投資於自己最有信心的公司和行業, 對於我來講, 就係金融業.

另外, 見到網上報導, 高盛調低內地保險股的評級, 其中將平安保險的評級從「買進」調低至「中性」，Ｈ股目標價從１１８港元降至６０港元，而且還將該股從地區買進名單中刪除。高盛認為，中國平安近期發佈公告，計劃增發１２億股Ａ股以及多達４１２億元人民幣的Ａ股債券，而且有３１億股的非流通Ａ股將於３月３日解禁上市流通，接近其目前流通Ａ股的４倍。此外，中國平安較中國人壽和中國財險面臨更大的資本開支壓力，表現在平安的農村和城鎮擴張計劃、發展銀行業務以及正在進行的辦公集中化項目。(筆者唔明點解發展業務, 集中back office 會係負面的消息).

高盛同時調低中國人壽Ｈ股的目標價逾３６％，由52降至３３．２０港元，維持中性評級。(咁當初又set到個目標價咁高?)

高盛又調低多家中資銀行股目標價21%至31%，主要因應目前經濟環境轉差，美國經濟或步向衰退，加上中國通貨膨脹較高，預期內地今年度國內生產總值(GDP)增長將有所放緩。高盛預期，不少內地銀行2008年度的中間收入增長或將放緩，且不良貸款比率或上升，故調低多間中資銀行股的目標價，其中包括中信銀行（0998）及招商銀行（3968）等，兩者目標價分別由原來6.81元降至5港元，及由39.3元降至31.15元。

　然而，在眾多在港上市中資銀行H股中，高盛仍然看好工商銀行（1398）、交通銀行（3328）及建設銀行（0939）等大型銀行，並料它們將受惠淨利息收入穩步上升，及上年度已作出較大額的不良貸款撥備，故持續給予相關股份「買入」評級，但將其目標價分別下調22%至6元、23%至11.2元及27%至6.85元。

大行的報告, 從來唔會影響到我的投資決定, 我的固執就有可能影響到自己的投資決定, 不過衰係自己手, 技不如人, 心咁情願. 我會繼續持有手上的永久組合, 全部係金融股, 包括5, 945, 2318, 2628, 3328, 3968, 股價越跌, 只會趁機會繼續增持, 一股都唔會沽出.